Kini lah hari nan ka tigo pulua. Lai ka bisa lanjuik ambo ko ntah indak. Lah duo hari ko, ndak tantu apo nan ka ambo tulis. Lah paniang. 

Kapatang lah jatuah ka dalam aia mato ko mamikian apo nan ka di tulis. Di caliak kawan-kawan ambo yo sabana lancar. 

Ntah sia nan punyo ide kapatang, kompak nyo mambuek carito tentang talua. Hari iko, Yesi, lah carito talua lo liak. Batambah bulek  badan tu beko, Si.

Uki, hari ko beda topik. Uki carito cinto, tapi lai ka Yesi cintonyo. Buk Mul, keceknyo ka manulis tentang cinto lo, tapi alun ambo baco lai, karena alun dikirim Buk Mul.

Kini, ambo ka mancubo lo mangecek pakai bahasa daerah sarupo Uki. Sabalum ambo mulai, ambo nio manjalehan dima kampuang ambo. 

Papa jo Mama ambo aslinyo urang Piaman. Cik Ajo jo Cik Uniang kecek urang. Sajak manikah, marantau ka Teluk Kuantan, sampai kini. Kalau ambo, tantu urang Pariaman lo jadinyo.

Sajak lahia sampai SMA ambo di Teluk Kuantan. Ambo sangat pandai bahaso Taluak tu.

 Tamat SMA ambo kuliah di Padang. Bahaso ambo lah mulai barubah karena bakawan jo urang daerah lain. Kalau ndak tantu apo nan ka disabuik, ambo langsung bahaso Indonesia. 

Lulus kuliah, ambo baliak ka Taluak. Maaja anak SMA. Satahun di Taluak, SK ambo kalua di Pasaman, Kumpulan. 

Untuang modal bahaso Minang lai ado, jadi ambo ndak payah bana komunikasi. Tapi, kadang-kadang ambo pakai bahaso Indonesia, takuik ndak mangarati urang apo nan ambo kecekan.

Satahun di sinan, dapek jodoh urang Lubuk Sikaping. Batambah lo ciek lai bahaso daerah nan harus ambo baraja. Iko lun dapek, lah ka batambah lo ciek lai. Hadeh.

Kecek urang, kalau lah gadang ko baraja bahaso daerah, bisa patah-patah lidah ko. Untuang lidah ambo lai ndak sampai patah. Ambo punyo bahaso andalan, bahaso Indonesia. 

Limo tahun di situ, ambo pindah lo liak ka Padang. Ambo ulang liak kisah lamo, baraja bahaso Padang. Dulu, ambo di Padang tingga di kawasan kampus, tantu bahaso Padang ambo bacampua jo daerah lain. Kini ambo tingga di daerah Lubuk Begalung. Ambo cubo lo baraja bahaso Padang ala Lubuk Begalung ko.

Sampai kini ambo masih di Padang. Namun nan kampung tampek  ambo digadangkan lai ndak lupo do. Acok ambo turuik. 

Setelah mambaco carito ko, sanak jan protes tentang bahaso apo nan ambo tulis. Ambo pun bingung karena ambo dek acok pindah. Kok ragu juo sanak, cubo baco dari ateh liak, ba a kok bahaso ambo sarupo iko.

Padang, 1 Maret 2020